افرحي يا عروسة

ده حصل لما جه الوقت اللي كان لازم تنزل فيه عشان تكمل تحضيرات زفافها، وفي الوقت اللي كانت فرحانة فيه وماشية في كل حتة تقول انها عروسة بقت دلوقتي بتدعي في سرها ان محدش ياخد باله من دبلة الخطوبة اللي هي لابساها، ولما حد بيشوفها كانت بتبتسم ابتسامة لزجة وتقول "انا حشتري الحاجات دي عشان احضر بيها فرح"
في الاول كانت بتقول انا مش حتعامل مع المكان ده تاني، لكن بعد اللف والبحث والتدوير كانت بتلاقي ان كل الاماكن بتتعامل كده، عشان كده كانت بتهرب بكلمة حشوف رأي ماما او حلف كده لفة وارجعلك تاني، وده طبعا عشان تداري دهشتها من الاسعار الجنونية اللي كانت بتسمعها من البياعين والبياعات وكمان عشان تحاول تمسك لسانها واعصابها قبل ماتغلط او تقول كلام يعاقب عليه القانون
ساعاتها كانت بتفكر في المجتمع العجيب اللي هي عايشة فيه، ليه فجأة كل الناس اللي هي بتتعامل معاهم من سنين بقو بيتعاملو بالشكل ده!! الكوافير ضاعف سعره عشر مرات لأ والعوج بيقولها تحجزي قبلها بشهرين ونرد عليكي و ينفع او لأ، بياعين القماش اي قماش لونه ابيض يبقى سبع او تمان اضعاف القماش اللي مش ابيض، وبالتالي الاتيليه اللي بيفصل فساتين السوارية نفس الموديل ونفس الشغل تسمع اسعار مهولة رغم ان الفرق في اللون بس مش اكتر
برضه ادركت ان ده مش موقف شخصي منها ده عرف بيسري على كل العرايس، زي ما يكونو ما صدقو تقع تحت ايدهم عروسة وكل اللي يقدر يقلبها في حاجة يلحق، مايهمش بقى معرفة ولا زبونة قديمة ولا الكلام ده كله، وتحس ان لسان حالهم بيقول "هو ايه اللي خلاها تتخطب اساسا"، واخيرا بقى الحل كله في الانكار التام لكلمة عروسة وكلمة فرح والمطالبة بمعاملة مواطنة عادية مش معاملة عرايس
ويرجعو ويقولو ليه الناس مش بتتجوز، ليه الشباب بيهربو من الارتباط والجواز، طبعا معذورين اذا كانت مجرد البداية والتحضيرات للفرح بيحصل فيها كده يبقى تكاليف الحياة نفسها عاملة ازاي، لأ واللي يشل بصراحة ويخنق ان الناس دي لها يوم هي كمان حتتجوز فيه او تجوز حد من ولادها، يعني مثلا بتاعة الاتيلية دي مش حيجي يوم تجوز بنتها!! ولا الكوافير ده مش خطيبته في يوم حتروح تعمل شعرها!! حاجة غريبة جدا وموضوع فعلا يضايق والكلام فيه بيبقى حساس عشان كله اعتبارات ماديه والناس بتخاف تعلق عشان التفسير مش حيخرج عن حاجتين يا اما الاتهام بالبخل او الاتهام بتدني المستوى الاجتماعي وان كل الطبقات الراقية بتعمل كده، مع ان الموضوع نسبة وتناسب مش فارق فيه لا طبقات ولا غيره
وافرحي يا عروسة بس ماتبينيش فرحتك اوي احسن يستغلوكي وتفلسي