شملَلة

هو إنت ليه دايما غاوى
ترجع ميتين خطوة يا حاوى
وكل مرة تشوط الأرض
طولك زمانه وقع ف العرض
والمرمى خالى وبرضه تهِيف
طبع المدن غالب ع الريف
ولسه للتخاريف غاوى
آدى الألف شبكت فى الياء
ولا أىْ أىْ ولا استفتاء
غربالنا مافهوش غير رَدة
وآدى فرس ومالوش عِدّة
واللى رمح ع الحيط هدّى
شفنا الحصان رسم مخدة
والشوكة جرحت مية وردة
والجرح عَبّى نتر مِدّة
جاب اللى جاب ليكون ودّى
شفت الجلاء بعد ما صدّى
ورمى عليه رطل مَوَدّة
تعب المغنّى من الرّدة
حدوة زماااان وصفوها دواء
حافر يهبّ ويتحدى
حافر مخاوى وبيساوى
بين الرباب والسمّاوى
ولسه واقفة ف نقطة جير
مدوّرة والسر ف بير
وحرف باء وعليه شدّة
اللين سحب سيف الشّدة
ضربة جزاء
والخوف صَدّة