آراء حرة

03:20 مساءً EET

ندى هشام تكتب : فيلم الثورة

 كلاكيت أول مرة : " دكتاتورية تونس سقطت .. ورئيسها يهرب " .. ممكن نعمل ثورة احنا كمان ؟! ممكن طبعًا .. يوم 25 يناير 2011 عيد الشرطة إذًا يوم ثورتنا .. إطبع إنزل إحشد .. أعداد كبيرة جدًا .. فض التحرير والأربعين وسيدي جابر بالقوة .. إنزل 26 و27 مكملين .. اعتقالات وإصابات وسقوط أول شهيد وعنف ؟! إنزل 28 جمعة غضب .. قطع الإنترنت والمواصلات ووسائل الإتصال وسقوط قتلى وفتح السجون واقتحام الأقسام وهروب المساجين وعمليات سرقة وسلب ونهب وفوضى والناس خايفة .. الجيش نزل بيقى هيضربنا ؟ لأ ! الجيش والشعب إيد واحدة .. مبارك عمل بيان .. هيتنحي ؟! لأ هيشيل حكومة نظيف بس .. إنزل تاني .. خطاب تاني واصبروا شوية والناس عيطت واتعاطفت وعايزين استقرار مش عايزين ثورة .. لأ إنزل كمل ولو لوحدك .. موقعة الجمل وناس بتموت .. كمل عشانهم وعشانك .. كنتاكي وبلطجية وعلاقات جنسية كاملة وريش وبيتزا وحماس وإيران وتمويل أجنبي وعمر سليمان .. كمل الثورة .. كمل حلم التغيير .. إنزل تاني وتالت ورابع لحد الحرية .. الشعب يريد إسقاط النظام .. مش هنمشي هو يمشي .. 11 فبراير ملايين في الشارع .. خطاب عمر سليمان .. مبارك اتنحى الله أكبر وانتصرت إرادة الشعب والراجل اللي ورا عمر سليمان .. الحلم اتحقق والجيش والشعب إيد واحدة وسيبوا الميدان عشان العجلة تدور ..

كلاكيت تاني مرة : الجيش بيضرب في المتظاهرين .. كشوف عذرية ! استفتاء .. نعم للجنة ولا للنار والإخوان باعوك .. مش مهم هتكمل من غيرهم .. القبض على صفوت الشريف وزكريا عزمي وفتحي سرور ومبارك .. الله أكبر .. الحكومة عملت ايه ؟ عصام شرف لغى التوقيت الصيفي !! ضرب في التحرير واعتصام يوليو وفض الاعتصام والإخوان باعوك والجيش داس الناس في ماسبيرو .. مكملين .. أبو إسماعيل نازل انتخابات ويبدعي لاعتصام 18 نوفمبر وثورة جديدة .. وثيقة ومليونية والإسلاميين سابوك لوحدك .. طب فين الشيخ حازم ؟ ها ؟! .. مكملين .. اعتصام مصابين ثورة وفض الاعتصام .. إنزل إحشد .. مجزرة محمد محمود .. هننزل كل يوم مش هنسكت .. ناس كتير بتموت .. العرس الديمقراطي .. ها ؟! فين ده ؟ يمكن .. يسقط يسقط حكم العسكر .. الإخوان باعوك والعسكر مش هيمشي .. مش مهم .. يسقط يسقط حكم العسكر .. الجنزوري رئيس وزراء والإخوان والسلفيين فرحانين وباعوك .. مش مهم هننزل وهنكمل حلم التغيير .. اعتصام واتفض بالقوة وسحل وتعرية وست البنات وعلاء عبد الهادي وعماد عفت .. الناس مش متعاطفة معاك وبيقولوا ايه اللي وداهم هناك ؟ ايه اللي لبسها عباية بكباسين ؟ خلاص احشد ليوم 25 يناير 2012 استعد .. الناس كلها ضدك والإخوان باعوك .. أناركيه .. البرادعي اعتذر عن الرئاسة .. مش هيترشح ليه ؟!!! مش هيشارك في لعبة العسكر ! وحلم التغيير ؟! هنكمله لوحدنا .. يوم 25 جه .. الناس بتحتفل .. بتحتفل بايه ؟! بعيد الثورة .. وهي الثورة نجحت ؟! ميين بيحتفل ؟! الإخوان .. وعاملين منصة ومشغلين أغاني ؟! وهما الإخوان عملوا الثورة أصلًا ؟!! .. هنكمل وهنسقط العسكر .. مذبحة بورسعيد ! يسقط يسقط حكم العسكر .. البرلمان أخيرًا .. ايه بيناقش ايه ؟ منع اللغة الإنجليزية وختان الإناث وسن الزواج !! مش مهم انتخابات الرئاسة اتحددت خلاص .. مين نازل ؟! الإخوان نازلين بالشاطر .. أبو الفتوح وفي حمدين صباحي بيقى كلنا مع حمدين بس فرصته ضعيفة .. عمرو موسى وشفيق فلول .. استبعدوا حازم والشاطر من الترشح ؟!! .. ليه ماما أمريكية ؟! .. الإخوان نزلوا بمرشح تالت ؟!! مين ده ؟! مناظرات مناظرات مناظرات .. حمدين فرصته بقت أحسن .. يارب .. الإعادة بين مرسي وشفيق !!! إنا لله وإنا إليه راجعون .. الثورة ماتت ولا لسه في أمل ؟! مكملين إنزل وقول لأ للنتيجة دي .. الإخوان نزلوا معانا !! هتافات ضد شفيق ماشي بس مع مرسي لأ .. ايه نعصر ليمون ؟!!! نعصر ليمون .. لأ أنا هقاطع .. لأ أنا هعصر ليمون .. ايه حمدين بتاع مصلحته ؟ الإخوان خطر .. لأ شفيق أخطر .. النتيجة محمد مرسي رئيس الجمهورية .. مرسي رئيس الثورة !
 
كلاكيت تالت مرة : قائمة ال100 يوم وعهود ووعود .. مفيش كهرباء والنور بيقطع كتير .. الزبالة كتير .. الجنود ماتوا وهما بيفطروا !! إقالة عنان وطنطاوي .. تكريم عنان وطنطاوي !! قلادة نيل !! الفلول نازلين 24 أغسطس .. ملناش دعوة .. ال100 يوم خلصوا ومحصلش حاجة .. إنزل جمعة كشف حساب .. الإخوان نازلين ليه ؟ ايه ؟! الإخوان كسروا منصة التيار الشعبي .. هننزل تاني .. ذكرى محمد محمود .. الداخلية ضربت نار .. جيكا مات !!! مرسي هيقول حاجة .. الإخوان نازلين تأييد للحاجة قبل ما تتقال .. إعلان دستوري وتحصين قرارات .. سقطت الشرعية! مرسي لازم يمشي .. جبهة إنقاذ .. فيها ثوار وفلول ؟!! يمكن .. مظاهرات ضد الإعلان الدستوري ومظاهرات مع الإعلان الدستوري .. هنعتصم .. عند الإتحادية .. ايه ؟! الإخوان هاجموا الإعتصام ؟!! مسلحيين !؟ ضربوا وقتلوا الثوار.. جبنة نستو ؟! ومعفنين .. الحسيني مات !! فين مرسي ؟! بيتأمل المشهد .. الدستور فين الدستور ؟! اتسلق وفي استفتاء .. هنقول لأ كلنا .. والنتيجة نعم ! وقالت الصناديق للدين .. نعم ! حلم التغيير لسه موجود .. مكملين وهنحشد ليوم 25 يناير 2013 .. عدد كبير جدًا .. يوم 26 يناير 2013 محاكمة بورسعيد .. ناس بتقتل بعض .. ليه ؟! .. محمد الجندي اتخطف .. لقيناه .. ايه اللي حصله ده ؟! مين عمل فيه كده ؟! حادثة عربية ؟! اعتداء ؟! .. الجندي مات !! .. نهدى شوية .. الإخوان ركبوا .. ودلدلوا رجليهم .. كل حاجة إخوان .. مجلس الشورى كله إخوان !! مكتب الإرشاد هو اللي بيحكم مصر .. هنكمل حلم التغيير .. يسقط يسقط حكم المرشد .. تمرد ! .. هنجمع توقيعات لعزل الرئيس .. هيحاربوك و الاخوان هيضربوك وهيشككوا فى أرقامك وهيعملوا تجرد .. تجرد !! .. الناس هتقولك هو كل مميعجبكش رئيس تمشيه ؟! عايزين استقرار .. ده رئيس منتخب .. هتمشي المنتخب ؟! .. أيوه ومكملين حلم التغيير وهننزل في كل مكان .. صور ورق وجمع توقيعات وابعت لتمرد وهنفرز ونعد وميعادنا يوم 30 يونيو .. ها رد الفعل ايه ؟ الناس مش عايزة الإخوان .. الفلول معانا ! والداخلية كمان ؟! .. الأمل كله في تمرد ..حركة محافظين ؟؟ محافة الأقصر منين ؟!!! الإخوان بيهددونا بيقتلونا بيخطفونا .. إرهاب .. الزمر وعاصم عبد الماجد وصفوت حجازي .. فين مرسي ؟ معرفش .. مكملين .. مؤتمر سوريا .. جهاد ! بيدعوا علينا ‍! .. خطاب 4 ساعات .. أي كلام في أي كلام وفودة بتاع المنصورة وبلطجي المعادي .. تهديد للمعارضة وللإعلام وللثوار .. طب مكملين .. يوم 30 يونيو جه .. إحشد إنزل .. ايه الأعداد دي ؟!!! أعداد مهووولة .. هنعتصم كلنا والإخوان هيمشوا .. ايه الجيش عمل بيان ؟!! بيقول ايه ؟ .. 48 ساعة .. مرسي بيهددنا هنبقى زي سوريا .. مش هنمشي هو يمشي .. ال48 ساعة خلصوا .. ها البيان فين لسه ؟! .. الجيش شال مرسي الله أكبر !! وجاب عدلي منصور .. الله أكبر .. احتفالات ونصر وانتصرت إرادة الشعب واتمردنا !
 
كلاكيت رابع مرة : مبارك سقط والعسكر مشي والإخوان مشيوا .. حلم التغيير قرب .. اعتصام رابعة .. عايزين دستور جديد وحزب النور معترض طب البرادعي رئيس وزراء بس حزب النور معترض طب زياد بهاء الدين لأ حزب النور معترض .. البرادعي نائب رئيس الله أكبر .. الثورة بتحكم أخيرًا .. ثورة ؟! انقلاب .. انقلاب ؟! لأ ثورة .. أبو الفتوح بيقول انقلاب .. الإخوان نازلين مظاهرات .. قتل كتير ! .. مذبحة سيدي جابر ورمي الأطفال من فوق السطح .. فوتوشوب ؟ الإخوان ضربوا على الجيش والجيش رد .. لأ العكس الجيش هو اللي بدأ .. الجزيرة بتطبل للإخوان .. مجزرة حرس جمهوري ! بيطلبوا من أوباما يلحقهم !! العريش قلق والجنود بتموت .. الإخوان شمتانين .. السيسي طلب تفويض ضد الإرهاب .. كلنا ضد الإرهاب .. لأ ده تفويض بالقتل .. لأ احنا معاه .. اضرب يا سيسي واحنا معاك .. تاني ؟! مليونية .. الإعلام بيطبل للسيسي .. الناس بتموت من هنا ومن هنا .. أشتون سابت البرادعي .. الإخوان عايزين تدخل أجنبي !! الإخوان مسلحين والاعتصام مسلح .. رابعة بؤرة إرهاب .. هنفض الاعتصام .. لأ مش هنفضه لو راجل فضه .. السبت هيحصل حاجة الأحد مرسي معانا .. أي كلام .. في ثوار متعاطفين وفي لأ .. ميدان تالت ؟!! ميدان رابع !؟!! الإخوان بيقولوا مرسي راجع .. بيشتموا العسكر .. فين عدلي منصور ؟!! فين ؟!! مؤقت ؟! يمكن .. الأزهر عامل مبادرة .. فضوا الاعتصام ؟ لسه .. طب مجاري ونور نقطعهم عليهم .. حياتنا واقفة والسكان خايفين ما تسمعوا الكلام عشان عجلة الإنتاج .. أنا سمعت الكلام ده فين قبل كده ؟! التحرير مليان فلول وشرطة وجيش وناس عايزة استقرار ورابعة إخوان إرهاب والميدان التالت مصر القوية وحازمون وناس مش فاهمنهم ومرسي ممسوك .. فضوا الاعتصام .. ناس كتير اتقتلت المشارح والمستشفيات مليانة .. جثث تحت المنصة وجثث متفحمة .. مين حرقها ؟! الجيش لأ الإخوان .. طب مين اللي ضرب نار .. احنا معناش سلاح واحنا ضربنا غاز ومياه .. فين الإنسانية فين فين فين …. بلاش شماتة .. لأ يستاهلوا .. مسجد رابعة ولع والكنايس بتولع وقسم كرداسة والعساكر والظباط بيموتوا ومجزرة أسوان !! .. مين بيعمل كده ؟! الإخوان إرهاب .. لأ الجيش قاتل .. ميدان رمسيس وجامع الفتح و خطاب السيسي ومحمد بديع المرشد اتمسك واعترف على البلتاجي وصفوت حجازي مش إخوان والكتاتني رئيس الحزب بس مش إخوان .. الإخوان إرهاب .. لأ أه لأ أه .. بس .. مبارك إخلاء سبيل .. لسه مكمل ؟ مش عارف .. طب لسه عندك أمل ؟ مش عارف .. طب حلم التغيير موجود ؟ مش عارف .. فركش !
 
 
 
 

التعليقات