بالفيديو.. كلمة الرئيس #السيسي في افتتاح #مجمع_الأسمدة الفوسفاتية بالعين السخنة

قال الرئيس عبدالفتاح السيسي، إن هناك الكثير من المشروعات التي انتهت وتحتاج إلى الافتتاح: “في مشاريع كتير خلصت ومفترض نفتتحها علشان نفرح ونأكد وجود الأمل اللي الأشرار المخربين المدمرين بيحاولوا يهدوه”.

ووجه الرئيس السيسي، في كلمة له بافتتاح مجمع الأسمدة الفوسفاتية والمركبة بالعين السخنة، الأربعاء، رسالة للإرهابيين الذين يستهدفون الدولة المصرية: “لأ لأ، مش هتقدروا، مش علشان إحنا جامدين يعني.. لأ.. لأن ربنا ميرضاش بكده، ربنا خلق الإنسان لعمارة الأرض مش لتخريبها أو قتل الإنسان”.

وتابع الرئيس السيسي: “شوفوا يا كل المصريين بصوا على الدنيا حوالينا، هل في دين بيقام كده؟ هل في إصلاح يقام بالهدم؟ أنا قولت الكلام ده مرة ومرات كتيرة بس التصدي ليه مش الدولة بس، إحنا كمجتمع لازم نفهم أولادنا ونوعيهم ونحصنهم ضد الفكر ده”.

وأكد الرئيس: “مفيش دول هتطلع قدام بالهدم، هتطلع بالانضباط والجهد والتعليم والصبر والبناء، بقول تاني ربنا ميرضاش بكده، إحنا في طريقنا هنفضل نبني ونعمر طول ما إحنا عايشين”.

وافتتح الرئيس عبدالفتاح السيسي، منذ قليل، مجمع الأسمدة الفوسفاتية والمركبة بالعين السخنة، والذي يعد من أكبر المشروعات القومية في مجال الأسمدة الفوسفاتية بالشرق الأوسط، وتجدر الإشارة إلى أن المجمع تم الانتهاء منه في وقتٍ قياسيٍ، وطبقًا لأعلى معدلات الجودة في العالم.

ووقع انفجار منذ يومين استهدف المعهد القومي للأورام ما أسفر عن استشهاد نحو 20 شخصًا وإصابة 30 آخرين.