آراء حرة

01:35 مساءً EET

د. محروس عتاقي : بكتب لمصر (قصيدة)

وانا كل ممسك قلم .. ايدي بتتحجم ..ولساني يتلجم ..وقلبي يدق دقاته السريعه.. وانسى الحروف .. وانسى الكتابه..

ولما بكتب ..
بكتب بلون أحمر ..
وحروف مليها الخوف
وسن قلم مكسور ومتقطم ..
وورقة سودة مقطعه
لعرف اشوف السطر
ولا ايدي جيباه
ونسيت حروف البر
ولا عيني فكراه   

وانسى في يوم إن أنا خطاط
وأرجع أقول مين اللي خلاني كدا
هي البلد والا اللي فيها..

ليه يابلدنا واللي فيكي
بتعملوا فىّ كدا
تستخسروا فىّ الكتابة
وترضعوني الخوف
وتعلموني بس (أ س ك ت) يبقى سكات
وتعلموني أكتب كلامي على البلاط
واللي بيقرا يرتعش ..
خايف .. يقول الشوف
أصله متعود يقرا السكات ..

بس يدوس وبيفركه بلون البلاط
ويبقى سجاده للي عاوزنه .. بلااااط
والكلام اللي كتبته اللي هي: أسكت سكات
جملة مفيدة للي بيحبوا السكات
لكن أنا .. طول عمري أشخبط ع الجدار
منا خطاط ..

اااااااالله يرحمك يا حجنا (محمود)
كل ماتشفني بذاكر
تقولي ( بتذاكر والا بتزخرف)
أضحك أنا ويااااااك
وتبصلي بصه

زخرف ولا يهمك
أكتب وزخرف .. وارسم ورود
وبين للخلايق قدرة المعبود
وطلع في كتابتك همك
واللى ف يوم عاوز يشد القلم منك 
متعبرووووش
وكمل .. يمكن تكون رسام
بس رسوماتك يامحروس ..
لازم تكون بيضه
مش شخبطه وخلاص
لا ..
عاوز كلامك أبيض ..
اللي يكتبه .. أبيض
واللي يشوفه .. أبيض
دا الكلمة يابني رصاص
للي بيفهم .. واللي ف قلبهم اخلاص

بعد 14 سنة من وفاة الحاج (محمود أحمد عتاقي)

أأأأأه ياعمنا محمود ..
محتااااار أكتب لمين .. والهم سابقني ..
أكتب لناس داقت مرار الليل
والا لناس زاطت ورى المواويل
والا لناس تعبت ..
والا لناس خلت الكفر يبقى سبيل
والا لناس قلبت بطلنا عويل ..

ولا .. ولا .. ولا إيه
قولي يابلدنا انتي أيه
حاسه بينا ولا إيه
شيفانه والا مغمضه
والا العيون اتحجبت
واللون بقا اسود غطيس
وادبدلت كل الحكاوي
بصوت نواح ..
واتشققت أرض الأحبة
واتسقت غلب وجراح ..

شيفانه والا مغصوبه
والا العيون ابيضت
والقلب دق وخلّص
واللون لحمر خلاص نشفت مواريده

بكتب ياغالية
ومش هبطل فيكى .. كلام
هو انتي تستاهلي كدا
أبداً حببتي إنتي تستاهلي العلام ..
معرفشي دا عيبك إنك معانا حنينه
والا عشان بتطبطبي وتدلعي
وتضللي وحاجات كتييييره أقوى عندي من الكلام 

فاكرك زمان لما كنتي بتهمسي همسة حنان
وبكفك الأبيض تطبطبي علينا الحكاوى ..
وتملي عقلنا بكلام غناوي ..
ونتوه لما تحكيلنا حكاية الشاطر حسن ..
وكل واحد فينا يقول أنا حسن .. أنا حسن ..

أأأأأأه يابلد
فاكره زمان
لما كنتى بتهمسي همسة كلام
كل البلاد تسمع
وتضرب سلام
عشان كنا كلنا حسن .. لا
زرع .. حسن .. القمح 

د/ محروس محمود عتاقي
مدرس م الرسم والتصوير بجامعة الأزهر

التعليقات