عمرو الليثى: اللى بيمشى على الدائرى لازم يشيل كفنه معاه

وقال “إمبارح أطفال زى الورد.. خارجين لمدارسهم.. ركبوا الباص بتاعهم زى كل يوم ومشيوا ع الدائرى وفجأة الأتوبيس اتقلب، الأطفال اللى زى الورد الحمد لله بخير.. ربنا نجاهم، وهو الأعلم بحال أهاليهم وقلوبهم اللى مش مستحملة حزن أو وجع، وبكتيرهم جاتلهم كسور ورضوض، بس الحمد لله كلهم زى الفل، ومع ذلك.. ملعون أبو ده مرور ودى شوارع وده سلوك..المشى ع الدائرى بقى لعنة.. واللى بيمشى ع الدائرى دلوقت بيبقى شايل كفنه”.

ووجه الليثى خلال الحلقة اللوم على الحكومة، وقال “اقبض وحاكم وحاسب المخالفين قبل ما تلوم سلوك المواطنين، وغلظ فى العقوبات بس الناس ما تموتش فى حوادث طرق بسبب تقصير من الكل”.

وأيضاً من الموضوعات التى ناقشها الليثى فى الحلقة حادث وفاة الزرافة فى حديقة الحيوان بسبب سلوك المواطنين أو زوار الحديقة، وقال “البقاء لله فى الزرافة وفى الضمير.. ماتت زرافة جنينة الحيوانات منتحرة زى ما الأخبار قالت بس أنا بقول لكم إنها ماتت بسبب الإهمال، وأن حديقة الحيوانات بالجيزة، اللى هى من أقدم حدائق الحيوان فى العالم بقت خرابة”، واقترح الإعلامى عمرو الليثى فكرة بيع الحديقة إلى جهة قطاع خاص ليهتم بها ويرعاها ويقوم برفع سعر التذكرة وأيضاً يراقب سلوك الزوار ويحمى الحيوانات الموجودة بالحديقة.

أما فى فقرة الحواديت تحدث الليثى عن أسطورة الحواديت والتى تربينا على صوتها الدافئ “أبلة فضيلة”، وقال “أبلة فضيلة علمتنا نتعلم من الحواديت والحدوتة اللى ما نتعلمش منها ما تبقاش حدوتة”، وروى الليثى عدة حواديت تنتهى كل منها بمعلومة ونصيحة للمستمعين.

وفى نهاية الحلقة تناول الليثى كأس العالم للأندية، الذى يشارك فيه نادى الأهلى ويتواجد حاليا فى المغرب، وقال “المرة دى بقى نفسنا ومنى عيننا إن الأهلى يوصل للمباراة النهائية، واللى كل المؤشرات بتقول أن طرفها الأصيل هيبقى فرق بايرن ميونيخ الألمانى، بطل أوروبا الأسطورى نفسنا الأهلى يلعب ع الأول والتانى ويسطر تاريخ جديد لكرة القدم المصرية والأفريقية”.