مصر الكبرى

10:23 مساءً EET

مدفع المحكمة !

اصبح  كل شئ فى مصر معرضا للعرض على القضاء!آه خلاص!كل شئ بمعنى كل شئ!حتى لو ليس القضاء مختص به! حتى لو هو شأن دينى روحى بحت! هو كدة!اصبحنا كل اسبوع على موعد بسؤال ساذج من افواه العامة و البسطاء: هى المحكمة امتى؟ هى جلسة الـ"مـش عارف" ايه امتى؟ هو المسلسل امتى؟

و خد عندك من الردود بقى:-    يااااه يا ابويا! دى اتأجلت لسبتمبر! –    ده اغسطس اجازة القضاء يا بيه! –    يااااادى القرف! اتأجلت تانى؟! و لا خد عندكتانى لبشة القضايا اللى احنا على موعد معاها عزيزى القارئ طوال هذا العام:حل التأسيسية..و حل الجماعة المحظوظة..و حل مجلس الشورى..و عزل الرئيس..و محاكمة طنطن و سمسم..و الطعن عليهم..ده غير طبعا دعوى ننوس عين الهانم جيمى دفاعا عن فرعون مصر..و لا دعوى حبيب عين مصر و وزير داخلية جهنم للدفاع عن سيادته (او سمها "ساديته!")..و طبعا هاتك كل شوية يا رد المحكمة.."القاضى منحاااز".."القاضى صاحب مصلحة".."القاضى ابن عمة امه كان شغال مع سكرتير المتهم سنة 1999 فى مكتب اكتوارى!"و عندنا كمان يا معلم دعوى هانى ابو ريدة علشان يخش الانتخابات اتحاد الكرة – كله كوم و ابو ريدة ده مايبقاش رئيس اتحاد كرة القدم كوم تانى! يا نهار ازرق! الا ما يبقاش ريس اتحاد الكووورة دى كمان! ايووه يا جدعان! ده الشعب يملى الميادين!!– لااااااء..و لازم يكسبها كدة كدة غصن عن عين التخين! آه! امال ايه؟ و كله بالديموقراطية..هاتنتخبوه يعنى هاتنتخبوه!و عندنا كمانقضية قناة الملاعين..و قضيتين ازدراء الاديان..على دعوات الطعن فى انتخابات البابا..على..على..على..خلاااااااااص اصبحنا نفطر و نتغدى و نتعشى اخبار القضايا و المحاكم يا ريّس..و ملعون ابوك يا دستور..يا لعبة فى ايدين شوية دجلة و مشعوذين! المهم..الجلسة امتى؟و دخلخلاص فى قاموس حياتنا اليومية كلمات من شريحة.."محكمة اول درجة".."انا لى واحد صاحبى محامى قال لى".."استشكال".."نقض".."استئناف".."ابتدائى" و اعدادى و فنى..الخ..الخ..ده ايه القرف ده؟!ده المفروض يا جدع يعملوا لنا بقى على كدة ملحق فى الجرائد القومية يسموه اخبار القواضى و المحاكم! اهرام القضاء العالى! محكمة المصرى اليوم! منصة اليوم السابع! كدة! حاجة آخر غلب!و المواطن الغلبان اللى بيوحوح لك من اسعار الطماطم و الخيار و الجرجير – لاء و الفاصوليا! – ساب كل ده و بقى عنده استباق شديد و اهبل لمعرفة اخبار كل جلسة و خلاص كدة اتعشت!..و بكل عنترية كل ما يفعله – كل مرة – هو ان يقوم يمصمص شفايفه بعد معرفة منطوق الحكم و يتريق لك بسلامته على قضائنا الشامخ العادل المنزه! حاجة قلة ادب يا جدع!اللى يشوف حالة التلهف على قرار القاضى و القضاء فى هذه المسائل يفكرك بمنظر الصائم المدخن الذى ينتظر المدفع و السيجارة تتقافز فى يده اليمنى و الولاعة بتتنطط فى يده اليسرى و الذى ما ان يضرب المدفع حتى يقفز من على الكنبة و يدفع بالسيجارة الى فمه و يشعلها فى نفس اللحظة و يبتلع نفسا عملاقا من السيجارة ثم يفتح فاه عن آخره ليخرج حلقات "دوناتس" من الدخان فى النشوة حالمة! ياااااا سلااااااام..هى نفسها فتحة الفاه البلهاء الغبية التى تصيبه و اللى عدم اللامؤاخذة بيفتحها بعد سماع الحكم الذى ينتظره من اسابيع طويلة! و سرعان ما ينساه بعد ثوان! و لااااااااا الهوا يا معلم! نفس فتحة ضبه البلهاء دى اللى بيطلع منها حلقات بصل  من الدخان اللى بيدخنه من شكمان الكليوباترا اللى بيشربها! هى نفسها فتحه الفاه اللى بتلاقيه فاتحها و هو بيبيع ثورته للاسلاميين ببلاش فى الانتخابات! و لا على بال اهله فعلا! علما بانه اصبح طووووول الوقت قارفك باسئلته بتاعة: تتوقع ايه؟ هو ايه اللى هايحصل؟ و بعدين؟ و ايه آخرتها؟ تفتكر؟ ماتفتكرش؟ياااااااا الهى!هو مش انت و غيرك اللى بتعمله فى البلد كدة بسلبيتكم و جهلكم؟ثم انت الخبر عدى عليك بعد ما عرفته من الجرائد..هوا اساسا!طيب و الدستور يا جدعان؟الدستور يا بتوع الفاصوليا ام 12 جنيه؟ما هى مش هاترخص بدون لا دستور و لا بحث علمى!الا هو انت يا شعب مابتحرمش؟ ما بتوبش؟! يخرب بيت عدم نضجك السياسى فعلا!ماتصحى و تفوق شوية للطبيخ اللى بيطبخ و بيتسبك عليك من العمائم و الذقون و الزبيب! قوم يا اخى! اعمل حاجة فى حياتك غير المطالبة بزيادة رواتبك! احتج على سلق و عجن الدستور مثلا!اقرأ مرة حاجة تنفعك غير مانشيتات الصحف و بس! شارك فى مسيرة..اقف فى وقفة احتجاجية لحاجة تانية بالاضافة لزيادة المرتب..وعى غيرك..كفاية تنبلة و استسلام..كفاك بيع فى صوتك الانتخابى بالبخس و بالمجان لمن يقصمون ظهر مصر!ايها المواطن الكنباوى..القضاء المصرى العادل الشامخ النزيه جدا..لن يؤتيك بحقك و انت قاعد مفندق و حاطط رجل على رجل بتدخن..و بتطلع حلقات "دوناتس" من الدخان من فمك اللى انت فاتحه فى بلاهة ده..و انت بتبيع بلدك بمزاجك للمتأسلمين!اتعتع يا اخى!

التعليقات