مصر الكبرى

03:39 مساءً EET

مسودة الدستور المصرى الـ”مسودة!”

تشعر عندما تقرأ هذه "المسودة" السوداء باللاشئ! عارف اللاشئ؟ اهى هى دى المسودة السودة بتاعة الدستور!

ماتفهمش ده كلام مكتوب فى المسودة دى على اى اساس او منين! تشعر انه موضوع تعبير..او انشاء..على شوية بلاغة..على دقيقتين نشيد وطنى..على حفنة بديهيات و منطقيات! لاء و منطقيات ايه..هبلة هااااااااابلة الصراحة!ايه ده يا "كماعة"؟هو ده كدة الدستور؟بقى مصر جزء من افريقيا و جزء من حوض النيل؟ و اللغة العربية لغتها الرسمية؟ ده ايه الكلام الكبير ده؟
هو ده الدستور اللى محتاج فقهاء؟ هو ده اللى هانصوت عليه؟
احنا كان عندنا دستور..و كان مكتوب فيه كلام كبير من اللى بيوزن ده و من 30 سنة..بس اياك كان بيحترم قوى!اياك ده هايحترم؟ اياك هو ينفع انه يحترم فى بلدنا دى بثقافتنا المنغلقة "المعفنة" دى!بقى المواطنون فى مصر سواء؟ و الحريات الشخصية مصونة!بذمتك؟ مصونة؟انت حاسس ان بعد كتابة الدستور ان بمقتضى القانون و الدستور هاتبقى متساو مع من اكبر منك؟ (انت عارف انا اقصد مين باللى اكبر منك طبعا).بقى الحرية الشخصية مصونة صحيح يا مادة 31؟بقى الكرامة الانسانية حق لكل انسان و لا يجوز ازدراء اى مواطن و يكفل المجتمع حمايتها صحيح يا مادة 28؟ده الناس بتقتل و تغتصب فى الاقسام لغاية النهاردة!ده الضابط بيبهدل والدك او عمك او حتى جدك و ابن رئيس الجمهورية بيضرب الضابط! و من قبل ما يبقى رئيس جمهورية! و لا نسينا؟ (سنة 2011)
الله! انتوا بتستعبطوا يا جدعان؟ هل حد هايعمل حاجة لو تم خرق الدستور ده – مش بس القانون –لاء..الدستور؟
ثم ايه معنى كل هذا الكم من المواد الديكورية؟ و اللى الجميع يعلم بديكوريتها و هلاميتها؟و ايه حوار المادة 26 دى كمان؟فيه تلميح كدة..مش نضيف..و حقير ان الدولة ممكن ترجع لايام التأميم و الفقر و العفانة بتاعة زمان!طبعا مفيش اى من المناضلين اليساريين الاشاوس و لا بتوع الديموقراطية الاجتماعية المعملية الفذة اتكلم خالص عن المادة دى خالص! جاية على هواهم طحن طبعا! لانها بتفش جزء كبير من الغل الطبقى تجاه اى صاحب ملكية خاصة لا يستطيع اى ينافسه اى موظف فاشل او كسول او بليد!تأميم ايه تانى الله يخرب….!ولا المادة 11! دى بقى مش لاقى لها اى تلاتين لزمة!..قال ايه..تلتزم الدولة بتعريب العلوم و المعارف! يعنى هانعرب الطب و الهندسة مثلا؟ننتقل منها للمادة 37 بتاعة حرية العبادة و تكفل الدولة حرية اقامة دور العبادة، حاجة جامدة قوى الحقيقة!مادة لم و لن تضف شيئا..الدولة هى هى..قالت الكلام ده كثيرا..و معوقات بناء الكنائس اكثر من ان تعد او تحصى! بالرغم من وجود مثل هذه الكلاشيهات و الاسطنبات من ايام خفرع!و اراهن ان بناء الكنائس سيصبح اصعب بمرور الوقت..ده مثلا..و اراهن!المادة 39 بقى حكاية!.."حرية التعبير و الفكر مكفولة"..لاء ما هو واضح قوى..من غلق القنوات و الصحف و الاطاحة برؤساء تحرير الصحف الحكومية تحت اى دعاوى بلهاء و معافبة المذيعين لو استضافوا ضيوف مش من على وش القفص،
نكونش فاكرين ان الوضع هايتشقلب مثلا بعد الدستور؟
مادة 42 بقى..شرحه..بتاعة حرية الصحافة..حلوة حكاية حرية الصحافة دى..خصوصا بعد اخونتها!
مادة 44 بتقاوم التهجير القسرى مثلا زى بتاع دهشور و رفح و اطفيح..بس ابقى قابلنى لو اتفعلت!انا اقطع دراعك..ان ما حصل تانى! تفيد بايه يا دستور..و الامن غائب..و لا و الامن لا مؤاخذة متأخون..يا اخوانا!
و خد عندك كمااااان مادة تمنع حساب الرئيس..و مادة تترك تفسير مبادئ الشريعة –اللى هى فى ذات الوقت..المصدر الرئيسى للتشريع – لمن يختارهم الحاكم (قصدى مكتب الارشاد)..و..و..باستخصار..قراءة مسودة الدستور السودة دى لا تضيف جديدا و صياغتها ضعيفة و رديئة (قول زفت و اخلص!) ناهيك عن انها خيالية و عمومية جدا..فضلا انها لا تحقق طموح الثورة..او حتى طموح مليونية حتى فى طلعت حرب..
الدستور نفسه لا يحترم و لم يحترم فى مصر من قبل فى اى عصر..نحن نربأ بنفسنا ان نحترم اى دستور..سلو بلدنا الفوضى..و افة حارتنا..التغابى..حسبنا الله و نعم الوكيل فيكم ناخبين!

التعليقات